سڈنی : آسٹریلیا میں برفانی طوفان نے تباہی مچادی، 16 انچ کی ریکارڈ توڑ برفباری سے زندگی مفلوج اور ہزاروں گھر بجلی سے محروم ہوگئے۔
مشرقی آسٹریلیا میں آنے والے شدید برفانی طوفان نے معمولاتِ زندگی درہم برہم کر دیے ہیں۔ مختلف علاقوں میں 20 سالہ ریکارڈ ٹوٹ گیا، برفباری اور طوفانی بارشوں کے بعد ہنگامی صورتحال پیدا ہو گئی ہے۔
حکام کے مطابق برفباری نے جہاں کئی شہروں کو سفید چادر اوڑھا دی، وہیں سڑکوں اور بجلی کی بندش جیسے خطرناک حالات نے ہزاروں شہریوں کو متاثر کیا۔
آسٹریلوی میڈیا کے مطابق بارشوں کے بعد سڑکیں، گاڑیاں اور گھر برف سے ڈھک گئے، سیکڑوں گاڑیاں سیلاب میں پھنس گئیں، متعدد حادثات بھی رپورٹ ہوئے ہیں۔
یہ شمال مغربی خطے کے کچھ حصوں میں 20 سالوں میں سب سے زیادہ برف باری ہوئی ہے۔ ریاست کوئنز لینڈ کے ایک علاقے میں 10 برسوں بعد پہلی بار برف پڑی ہے۔
آسٹریلیا کے محکمہ موسمیات کے میٹرولوجسٹ نے بتایا کہ نیو ساؤتھ ویلز کے متعدد علاقوں میں ہفتے کو 16انچ برف پڑی ہے، جو 1980 کے وسط کے بعد سب سے زیادہ برف باری ہے۔
ریاست نیوساؤتھ ویلز کی ایمرجنسی سروس نے بتایا کہ کئی علاقوں میں تیز بارش ہوئی ہے اور اب تک ایک ہزار 445 سے زائد حادثات رپورٹ ہوئے ہیں۔ بعض علاقوں میں برف کی موٹائی 50 سینٹی میٹر سے تجاوز کر گئی، جس نے ٹریفک اور بنیادی سہولیات کو مفلوج کر کے رکھ دیا۔
ایمرجنسی سروس کے مطابق تیز ہواؤں اور برفانی طوفان کے باعث متعدد عمارتوں کو نقصان بھی پہنچا، جس کے بعد کئی مقامات پر فلیش فلڈ وارننگز جاری کی گئی ہیں۔
from ARY News Urdu- International- عالمی خبریں https://ift.tt/dZBa7PI
کوئی تبصرے نہیں:
ایک تبصرہ شائع کریں