سری نگر : مقبوضہ کشمیر میں بھارتی فوجی افسر کی جانب سے نجی ائیر لائن کے عملے پر وحشیانہ تشدد کا واقعہ پیش آیا ہے۔ جس کی ویڈیو وائرل ہوگئی۔
اے آر وائی نیوز کی رپورٹ کے مطابق سری نگر ائیرپورٹ پر بھارتی فوجی افسر نے نجی ایئرلائن کے اسٹاف پر لاتوں، گھونسوں اور راڈ سے حملہ کردیا۔
بھارتی فوجی افسر نے اسپائس جیٹ ائیرلائن کے گراؤنڈ اسٹاف کے چار ملازمین پر تشدد کرکے انہیں شدید زخمی کر دیا، عملے کے ایک رکن کی ریڑھ کی ہڈی اور دوسرے کا جبڑا توڑ دیا۔
تشدد کے شکار دیگر دو ملازمین بھی لہولہان ہوگئے، بھارتی فوجی افسر مقررہ وزن سے زائد بیگج طیارے میں لے جانے پر مصر تھا۔
ائیر لائن کے اسٹاف نے بھارتی فوجی افسر کو زائد بیگج ادائیگی کا کہا تو وہ آپے سے باہر ہوگیا، متاثرہ عملے کی درخواست پر بھارتی فوجی افسر کیخلاف بڈگام تھانے میں ایف آئی آر درج کرلی گئی۔
بھارتی فوجی افسر کی درندگی پر مقبوضہ کشمیر کی جماعتوں نے بھرپور مذمت اور اپنے شدید ردعمل کا اظہار کرتے ہوئے انصاف کا مطالبہ کیا ہے۔
رپورٹ کے مطابق بھارتی فوج نے اپنے افسر کیخلاف تحقیقات کا وعدہ کیا پھر چپ سادھ لی۔ متاثرہ شخص نے مذکورہ افسر کیخلاف کارروائی کی اپیل کی ہے۔
from ARY News Urdu- International- عالمی خبریں https://ift.tt/Rsfg409
کوئی تبصرے نہیں:
ایک تبصرہ شائع کریں